பெஃங்ஷுய் என்றால் காற்றும், நீரும், சீன மொழியில் பெஃங் என்றால் காற்று. ஷுய் என்றால் தண்ணீர். அதாவது, மண்ணும், விண்ணும், மனிதர்களும் இந்த முழு பிரபஞ்சத்தின் பகுதிகள் என்ற தாவோ மதக் கோட்பாடுகளின் அடிப்படையில், பல நூறு ஆண்டுகளாக சீன மக்களின் பண்பாட்டில் பெஃங் ஷுவய் இரண்டறக் கலந்து விட்டது. இது புவியியல், கட்டிடக்கலை, அறம் மற்றும் தேவவாக்கு என்ற அம்சங்கள் ஒருங்கிணைந்து கலந்த ஒரு துறையாகத் திகழ்கிறது.

பூமியின் காந்த வயலினால் ஒரு கட்டிட்டம் எந்த அளவுக்குப் பாதிக்கப்படும் என்று கண்க்கிடுவதே பெங் ஷுய். மேலும் ஒரு கட்டிடத்தைக் கட்டும் போது காற்றோட்டம், சூரிய வெளிச்சம் படும் கோணம், இரைச்சல் போன்ற அம்சங்கள் கவனத்தில் கொள்ளப்படுகின்றன. நல்ல பெங் ஷுய், தீய சக்திகளை விரட்டியடித்து, வாழ்க்கையில் வளம் சேர்க்கும். குடும்பத்தில் அதிக சச்சரவுகள் வராது. குழந்தைகள் கெட்டிக்காரர்களாக வளர்வார்கள். விவாகரத்து ஏற்படாது. இந்த நம்பிக்கையில் பெங் ஷுய் நிபுணர்களை மக்கள் அணுகுவது நாளுக்கு நாள் அதிகரித்து வருகிறது. இப்படிப்பட்ட நிலையில், அண்மையில், சீனாவின் கிழக்குப் பகுதியில் உள்ள பெருமைமிகு நாஞ்சிங் பல்கலைக்கழகமும், கட்டுமான அமைச்சகத்தின் சீனக் கட்டிடக் கலை மையமும் சேர்ந்து, சீனாவின் பாரம்பரியக் கட்டிடக்கலை பற்றியும், பண்டைய பெஃங்ஷுய் பழக்கம் பற்றியும் ஒரு பயிற்சி வகுப்பு நடத்தின.

ஒரு பல்கலைக்கழகமும், அரசின் துறையும் சேர்ந்து பெஃங்ஷுய் பற்றி பயிற்சி வகுப்பு நடத்துகிறது என்றால் இது ஒரு அறிவியல் துறை தான் என்கின்றனர், பெரும்பாலான மக்கள். அல்ல, அல்ல இது அறிவியல் அல்ல, இது ஒரு மூடநம்பிக்கை என்று அடித்துப் பேசுகின்றனர் பகுத்தறிவு வாதிகள். உண்மையில், பெஃங்ஷுய் அறிவியலா？ மூடநம்பிக்கையா？