ச்சியன்லாங், ஒருமுறை தனது தந்தைக்கு பிரியமாக இருந்த ஒரு வைப்பாட்டியைக் கண்டு மயங்கினான். ஒரு நாள் அவள் இருந்த அறைக்குச் சென்று, பின்னாலிருந்து கட்டிப்பிடித்து, அவளுடைய கண்களை கைகளால் மறைத்து, "யார் என்று சொல் பார்க்கலாம்" என்று காதல் விளையாட்டு விளையாடினான். திகைத்துப் போன அந்தப் பெண், கோபத்தில் கொதித்துப் போய், பளார் என்று ச்சியன்லாங் கன்னத்தில் ஒரு அறை விட்டாள். இதைக் கேள்விப்பட்ட இளவரசனின் தாய், அவளைச் சவுக்கால் அடித்து, கழுத்தை நெரித்துக் கொன்றாள். இந்தத் தண்டனையை இளவரசனால் தடுத்து நிறுத்த முடியவில்லை. ஆனால் அவன் உடனே தனது விரலைக் கடித்து, பீறிட்டு வந்த இரத்தத்தில் ஒரு சொட்டை அவளுடைய கழுத்தில் வைத்தான். இது அவள் மீதிருந்த அன்பினால் அல்ல. அடுத்த பிறவியில் அவளை அடையாளம் கண்டு, பெண்டாளுவதற்கு ஒரு வசதியாக கழுத்தில் ரத்தத்திலகம் இட்டான்.

இப்படி பெண்களை மயக்க முயன்று தோற்ற மன்னனுக்கு ஒரு ஆண்காதலன் இருந்ததாகவும் சொல்கிறார்கள். அறுபது வயதைத் தாண்டிய பிறகு, தனது மெய்க் காவலர்களில் எடுப்பாக இருந்த ஒரு 25 வயது இளைஞன்மீது காதல் கொண்டு அவனுக்கு பல சலுகைகள் காட்டி, பதவி உயர்வு அளித்தான். தனது மகன்களில் ஒருத்தியை கட்டிவைத்தான். அவன் மூலமாக மன்னனுக்கு பேரக்குழந்தைகள் பிறந்தது. ஆனால் ச்சியான்லாங் செத்ததுமே அந்த இளைஞன் கைது செய்யப்பட்டு, கொல்லப்பட்டான். அவனுக்கு மன்னன் கொடுத்த எல்லாச் சொத்துக்களும் கட்டித்தந்த மாளிகையும் பறிமுதல் செய்யப்பட்டன். அந்த மாளிகைதான் இப்போது பெய்ச்சிங்கில் உள்ள கோங் இளவரசர் மாளிகை.