அண்மையில் தமிழ் நாட்டில் சட்டமன்றத்திற்குத் தேர்தல் நடைபெற்றது. அரசியல் கட்சிகளின் தலைவர்கள் அனைவரும் போட்டி போட்டுக் கொண்டு வாக்குறுதிகளை அள்ளி வீசினார்கள். அதிலும் "சொல்வதைச் செய்வோம். செய்வதையே சொல்வோம்" என்ற சொல் அலங்காரங்கள் தேர்தல் பிரச்சாரத்திற்கு கவர்ச்சியைத் தந்தன. இராமாயண காவியத்தில் கூட இராமபிரானின் உயர் பண்புகளாக ஒரு சொல், ஒரு வில் என்று சொல்லப்படுகிறது. வாக்குறுதிகளை அள்ளி வீசுவோர் சொன்ன சொல் தவறாமல் இருப்பார்களா? அல்லது சொன்னது நீதானா？ என்று கேட்க வைத்து விடுவார்களா என்பதைக் கணிப்பதற்கு யி யன் யி ச்சிங்-அதாவது ஒரு சொல் ஒரு செயல் என்கிறார்கள் சீன மொழியில்.

சிலர் வாக்குறுதிகளை நிறைவேற்றுகிறார்கள். சொன்ன சொல்லை மறக்காமல் செயல்படுத்துகிறார்கள். இப்படிப்பட்டவர்களை சீனர்கள் ஷு வோ யி பு அர் என்கிறார்கள். அதாவது இவர்கள் ஒன்றே சொல்வார்களாம்; இரண்டு அல்ல. இன்னும் சிலர் இருக்கிறார்கள்-ஒவ்வொரு நாளும் ஒரு வாக்குறுதி தருவார்கள். இப்படிப்பட்டவர்கள் சான் தியன் லியாங் தோ-அதாவது மூன்று நாட்களில் இரண்டு முடிவுகள் என்று கூறுகிறார்கள் சீன மக்கள். காலையில் சொன்னதை மாலையில் மறந்து விடும் ஆட்களை யி கன் அர் ஜிங் என்கிறார்கள். இப்படிப்பட்டவர்களை நம்ப முடியாது. ஏனென்றால் இவர்கள் பு சான் பு ஸி-அதாவது இவர்கள் மூன்றல்ல, நான்கும் அல்ல. இந்த மனிதர்கள் மற்ற விஷயங்களிலும் கேவலமாக நடந்து கொள்வார்கள் என்பதால், இவர்களை வெட்டு ஒன்று துண்டு இரண்டாக-யி தாவ் ஸியாங் துவான்-வெட்டி விட வேண்டும். அருகே நெருங்க விடா தீர்கள். ஆரத்தழுவி வரவேற்காதீர்கள்.