சிங்காய்-திபெத் இருப்புப்பாதை கட்டியமைக்கப்பட்டுப் போக்குவரத்துக்குத் திறந்துவிடப்பட்டதால், திபெத் விவசாயிகளுக்கும் ஆயர்களுக்கும் இன்பம் தரும் பாலமொன்று உருவாகியுள்ளது. தற்போது கடைகளும் உணவு விடுதிகளும் மழைக்குப் பிந்திய காளான் போல பல்வேறு தொடர்வண்டி நிலையங்களின் அருகில் தோன்றியுள்ளன. பலர் அங்கு பணி புரிந்து முன்பை விட கூடுதலான வருமானம் பெறுகின்றனர்.

திபெத் உழைப்பு ஆற்றல் சந்தைக்கு வாய்ப்பினை வழங்கும் அதே வேளை, இப்பிரதேசத்தின் பொருள் புழக்கம் மற்றும் போக்குவரத்து வளர்ச்சியையும் இந்த இருப்புப்பாதை கொண்டு வந்துள்ளது. இவ்வாண்டின் ஜூலை திங்களில் கடல் மட்டத்திலிருந்து 5100 மீட்டர் உயரத்தில் உற்பத்தி செய்யப்பட்ட 5100 திபெத் பனிக்கட்டி தாது நீர் இப்பாதை மூலம் சீனாவின் இதர பிரதேசங்களுக்கும் வெளிநாடுகளுக்கும் ஏற்றிச்செல்லப்பட்டுள்ளது. இருப்புப்பாதை, இத்தகைய நீர் உற்பத்திக்கான திட்டப்பணியைத் துவக்குவதற்கு முக்கிய காரணியாகும் என்று இந்நீர் தயாரிப்பு நிறுவனத்தின் தலைமை மேலாளர் சியாங்சியௌஹொன் அம்மையார் கூறினார். அவர் மேலும் கூறியதாவது,

எமது இத்தொழிற்சாலை கட்டியமைக்கப்படுவதற்கு முன்னரே சிங்காய்-திபெத் இருப்புப்பாதையின் கட்டுமானப் பணி துவங்கியது. இருப்புப்பாதையின் கட்டுமானம் பற்றிய தகவலை அறிந்துகொண்டதும், இந்த தாது நீர் ஆலையைக் கட்டியமைக்கத் துவங்கினோம். எங்களுடைய தீர்மானம் மிகவும் சரியானது என்பதை இந்த இருப்புப்பாதை இயங்கத் துவங்கிய கடந்த ஓராண்டு கால நடைமுறைகள் நிரூபித்துள்ளன என்றார் அவர்.

போக்குவரத்து வசதி குறைவு அல்லது வசதியின்மை ஆகியவற்றின் காரணமாக, திபெத் தன்னாட்சிப் பிரதேசத்தின் வளர்ச்சி கடுமையாகப் பாதிக்கப்பட்டது. தற்போது சிங்காய்-திபெத் இருப்புப்பாதை இயங்கத் துவங்கியதால், நெடுஞ்சாலை மற்றும் விமானப் போக்குவரத்துச் சுமை பெரிதும் தணிவடைந்துள்ளது. திபெத்திற்குச் சென்று வருவதற்கான போக்குவரத்து செலவு குறைக்கப்பட்டுள்ளதோடு, திபெத்தின் போட்டியாற்றலும் வலுப்பட்டுள்ளது.