|
பச்சைபசேலென மரங்கள் செடி கொடிகள், பருவகால மழை, விண்ணை தொடும் மலைகள் ஆகிய அனைத்தையும் கொண்டு இயற்கையோடு ஒன்றிந்த வாழ்வு வாழ்ந்த மனிதன் இடையில் அதனை தொலைத்துவிட்டு இன்று மீண்டும் அதனை தேடிக்கொண்டிருக்கிறான். விலைமதிப்பில்லா இயற்கை வளங்களை கூட இப்போது தான் தேட முன்வந்துள்ளான். அன்று வெளிநாட்டவர்கள் கடல் கடந்து பிற நாடுகள் சென்று மக்களை பிரித்து அடிமையாக்கி ஆண்டார்கள். அது பழைய காலனியாதிக்கம். இன்று வளர்ந்து வரும் ஆதிக்கம் நவீன காலனியாதிக்கம். எந்த நாட்டவரும் பிற நாட்டுக்குச் சென்று அடிமைப்படுத்த வேண்டியதில்லை. அவரவர் சொந்த நாடுகளில் இருந்து கொண்டே இன்னொரு நாட்டை அடிமை படுத்தும் அல்லது பிற நாடுகளின் மூலவளங்களை கொள்ளையடிக்கும் நிலை வளர்ந்து கொண்டிருக்கிறது. உரிமைகள் பறிபோகும் நிலை முனைப்பாகிக் கொண்டே வருகிறது.
உலகளவில் உற்பத்திப் பொருட்களுக்கு இரண்டு வகையான உரிமைகள் இருந்தன. அவை கண்டுபிடிக்கப்பட்ட பொருளுக்கான மறறும் கண்டுபிடிப்பு முறைக்கான காப்புரிமைகள். அதாவது ஒருவர் ஒரு பொருளை கண்டுபிடித்து விட்டால் அந்த பொருளுக்கு அவர் காப்புரிமை உடையவர். செய்முறை / முறைவழியாக்க காப்புரிமை என்றால் ஒருவர் ஒரு பொருளை கண்டுபிடித்தால் அதே முறைப்படி இன்னொருவர் அப்பொருளை செய்யக் கூடாது. ஆனால் வேறு முறைப்படி உற்பத்தி செய்து அந்த முறைவழிக்கான காப்புரிமையை பெற்றுக்கொள்ளலாம். தற்போது இவை ஒன்றிணைந்து அறிவுசார் சொத்துரிமை என்ற நிலையில் உலக அளவில் பரவலாகியுள்ளது. இது தொடர்பான விழிப்புணர்வும் வலுப்பெற்று வருவதை நாம் காணலாம்.
 ஊரான் ஊரான் தோட்டத்துல
ஒருத்தன் போட்டான் வெள்ளரிக்காய்
காசுக்கு ரெண்டு விற்க சொல்லி காகிதம்
போட்டானாம் வெள்ளக்காரன்
இது தான் வெளிநாட்டவர் நம்மை ஆண்டபோது இருந்த நிலை. நமது பொருட்களுக்கு அவர்கள் விலை நிர்ணயிப்பதா? அதாவது பொருட்களை உற்பத்தி செய்யும் நாம் தான் விலையை முடிவு செய்ய வேண்டும் என்ற உரிமைக்குரலை இது வெளிப்படுத்துகிறது. ஆனால் இந்த சமயத்தில் நாம் உற்பத்தி செய்த பொருள் நமக்கு சொந்தமாகத்தான் தான் இருந்தது. விலையை மட்டும் தான் அவர்கள் நிர்ணயித்தார்கள்
இன்றைக்கு என்ன நிலை தெரியுமா?
ஊரான் ஊரான் தோட்டத்துல
ஒருத்தன் போட்டான் வெள்ளரிக்காய்
காசுக்கு ரெண்டு வாங்க சொல்லி
காகிதம் போட்டானாம் வெள்ளக்காரன்
அன்றைக்கு விற்க சென்னவர்கள் இன்று வாங்க சொல்லுகிறார்கள். அதாவது இன்று உற்பத்திப்பொருளே அவர்களுடையதாகி நமது பொருளை நமக்கே அவர்களது விலையில் விற்கும் நிலை உருவாகிவிட்டது. திகைப்பாக இருக்கிறதல்லவா?
பல்வேறு நாடுகளில் இத்தகைய அறிவுசார் சொத்துரிமை பற்றிய ஆழமான புரிதல் தற்போது தான் வலுவடைந்துள்ளது எனலாம். உயிரியல் பொருட்களுக்கான காப்புரிமைகள் கூட உலக அளவில் செயல்படுத்தப்படுகிறது என்றால் ஆச்சரியமாக இருக்கிறது தானே. ஐந்து ஆண்டுகால கலந்துரையாடல்களுக்கு பிறகு சீன தேசிய சுற்றுச்சூழல் பாதுகாப்பு நிர்வாகமும் மற்றும் பிற பல அமைச்சுகளும் இணைந்து தேசிய சொத்துரிமைக்கான தொடக்ககால வரைவை கடந்த அக்டோபர் மாதம் வெளியிட்டுள்ளது. இதன் மூலம் சீனாவின் பூர்வீக உயிரியல் வளங்களை பாதுகாக்கும் கட்டமைப்புகளை அது விரைவுபடுத்திவுள்ளது. இதனை எதிர்கால சட்டத்திற்கான நகர்வாகவும் கொள்ளலாம். ஆனால் உயிரின கள ஆய்வாளர்கள் தேசிய அளவிலான சட்டத்தை விரும்புகிறார்கள். அப்படிபட்ட சட்டங்கள் இல்லாவிட்டால் நாட்டின் அறிவாற்றல் சொத்துரிமை பாதுகாப்பு தேக்கநிலை அடையும் என்கிறார்கள்.
உயிரின அளவிலான போட்டியானது கடுமையாக உள்ளது என அதிகாரிகள் ஏற்றுக் கொள்கின்றனர். அதாவது ஒரு நாட்டிலுள்ள உயிரின வளத்தை பற்றிய பரவலை பிற நாடுகள் பெற்று கொண்டு அதற்கான மற்றும் அவை அடிப்படையான பொருட்களின் காப்புரிமைகளை தங்களுடையதாக உரிமை கொண்டாடுகிறார்கள். இத்தகைய போட்டியாற்றலால் வளரும் நாடுகள் தான் மிகவும் பாதிக்கப்படுகின்றன. அடிப்படையில் சீனாவில் தோன்றி பல்லாண்டுகள் பயிரிடப்பட்ட சில பயிர்களுக்கு இன்று வெளிநாட்டினர் உரிமை கொண்டாடும் நிலைமை ஏற்பட்டுள்ளது.
சோயா அவரை பற்றி கேள்விப்பட்டிருப்பீர்கள். தொடக்கத்தில் 5000 த்திற்கு மேலான சோயா அவரை மாதிரிகள் சீனாவில் வளர்க்கப்பட்டுள்ளன. உலக அளவில் 6000 மாதிரிகளையும் 90 விழுக்காடு உற்பத்தியளவையும் கொண்டு சீனா இருந்துள்ளது. சோயா அவரையின் விதை மாதிரிகள் பரவலாக்கப்பட்டதால் 2000 சோயா அவரை மாதிரிகளின் மரபணு உற்பத்தி தகவல்களை இன்று வளர்ந்த நாடுகள் கொண்டுள்ளன. முன்பு சோயா அவரை வளர்ப்பில் முன்னணியும் பெரிய ஏற்றுமதியளரகவும் இருந்த சீனா தற்போது மிக பெரிய இறக்குமதியாளராக மாறியுள்ளது.
1 2
|
