உலக அளவில் வேளாண்மை முக்கிய மூன்று இடங்களில் முதன்முதலில் தோன்றியதாக கூறப்படுகிறது. மேற்கு ஆசியா, மத்திய மற்றும் தென் அமெரிக்கா, கிழக்காசியா ஆகிய இந்த மூன்று பகுதிகளும் தான் ஆதி வேளாண்மையின் மையங்களாக கருதப்படுகின்றன. இதில் கிழக்காசியா என்பது சீனாவையே குறிக்கிறது. தனது தனிச்சிறப்பியல்புகளால், சீன வேளாண்மை தனக்கென ஒரு தனி பாணியை, தனி வேளாண் முறைமையை நிறுவியது, உருவாக்கியது. உலகின் மற்ற நாடுகளுடன் ஒப்பிடுகையில் சீனா பல நூற்றாண்டுகளாக கொண்டிருந்த மேம்பாடுகளில் ஒன்றாக, தனது பெரும் மக்கள் தொகைக்கான உணவு மற்றும் வாழ்வாதாரத்தை வேளாண் தொழில்நுட்பத்துறையின் துணையோடு உறுதிபடுத்தியதை குறிப்பிடலாம். சீனாவின் 10 விழுக்காட்டு நிலங்கள் மட்டுமே வேளாண் உற்பத்திக்கு ஏற்றதாக அமைந்துள்ளது என்பதால் வேளாண்மையின் ஆற்றலும், திறனும் உயர்வாக இருக்கவேண்டியுள்ளது.