ஜுன் திங்கள் 25 ஆம் நாள் எங்கள் சீனப் பயணத்தின் ஆறாவது நாளாகும். இன்று காலையில் சற்றே ஓய்வெடுத்தபின், நண்பர் கிளிட்டசுடன் இணைந்து, பெய்ஜிங்களின் வீதிகளில் மகிழ்ந்தும், சில கடைகளுக்கு சென்றும் மகிழ்ந்தோம். பெய்ஜிங்கின் எல்லாப் பகுதிகளிலும் காணப்படும் சுத்தமான நிலைமை எங்களைப் பெரிதும் ஈர்த்தது. அன்றி, இங்கே உள்ள அங்காடிகள், மிகப் பெரும் அளவில் அமைந்துள்ளன. ஓர் அங்காடிக்குள் நுழைந்தால், அங்கே அப்பா-அம்மாவைத் தவிர, வேறு எல்லாவற்றையும் வாங்கி விடலாம் என்ற நிலை காணப்படுகிறது.

மதிய உணவு நண்பர் கிளிட்டஸ் அவர்களின் வீட்டில் சாப்பிட்டோம். ஒரு வார காலத்திற்குப் பிறகு, சாம்பார் மற்றும் இரசம் உள்ளிட்ட இந்திய உணவு வகைகளை உண்டு மகிழ்ந்தோம். மாலை வேளையில், அரைவடிவ நிலாப் பூங்கா சென்றோம். அங்கே, பொதுமக்கள் பலர் ஒன்றுகூடி மாலை நேரத்தை மகிழ்வுடன் கழித்துக் கொண்டிந்தனர். வயதான தம்பதியினருக்கான நடனப் போட்டி ஒருபக்கம், இளம்பெண் ஒருவருக்கு வூசு கலையைக் கற்றுத் தரும் ஆசிரியர் மறுபக்கம், இசைக்கு ஏற்றவாறு நடனமாடும் பெண்கள் இன்னொரு பக்கம், நம்மூர் ஆடு-புலி ஆட்டம் போல ஒரு வகை சீன விளையாட்டை விளையாடும் சீன நண்பர்கள் பிறிதொரு பக்கம் என அங்கே வேறுபட்ட காட்சிகளைக் கண்டு மகிழ்ந்தோம். பின்னர், கிளிட்டஸ் மற்றும் பஷ்டூ மொழி நிபுணர் ஆகியோருடன் காலார நடந்து சென்று பழைய பாணியிலான காய்கறி அங்காடிகளைக் கண்டுவிட்டு திரும்பினோம்.

பெய்ஜிங்கிலிருந்து எஸ்.செல்வம், எஸ்.பாண்டியராஜன் மற்றும் என்.பாலக்குமார்.