தொடக்கமாக

திபெத்தை சுற்றிவந்த நினைவுகளோ புறப்படும் நாள் இந்நாள். அதிகாலையில் எழுந்து, பெட்டியில் அனைத்தையும் அடுக்கி வைத்துவிட்டு காலை உணவு உண்டோம். பின்னர் எட்டு மணியளவில் லாசா கொங்கா பன்னாட்டு விமான நிலையத்தை நோக்கி சீருந்துகளில் வாகன அணியாக புறப்பட்டோம். காலை மழை பெய்து கொண்டிருந்தது. மழை தூறலில் சிறந்த இயற்கைக்காட்சிகளை இரசித்தவாறு பயணித்தோம்.

விமானம் தாமதம்

பத்து நாட்கள் கண்குளிர பார்த்த இயற்கைக் காட்சிகளையும், இயற்கை மணம் மாறா இடங்களையும் விட்டு செல்ல மனம் வரவில்லை தான். ஆனால்...... என்ன செய்வது? எங்களையும் விரைவாக அனுப்பிவிட திபெத்திற்கு எண்ணமில்லை போலும். அன்று பெய்த மழை நாங்கள் பிரிந்து செல்வதற்கு திபெத் வடித்த கண்ணீர் போல தோன்றியது. மேலும், நாங்கள் அதிக நேரம் திபெத்தில் இருக்க வேண்டும் என்பதற்காகவே முற்பகல் பதினொரு மணிக்கு என்றிருந்த விமானம் தாமதமாகியது போல் தோன்றியது. பிற்பகல் ஒன்று முப்பது மணியளவில் விமானம் புறப்பட்டது. இனிய நாட்களை, வாழ்வில் மறக்க முடியாத அனுபவங்களை தந்த திபெத்திற்கு பிரியாவிடை தெரிவித்து பயணம் தொடர்ந்தோம்.