டொரண்டோவில் வடிவமைக்கப்பட்டுள்ள டெல்ஸ்பிக் (Tellspic) எனப்படும் இந்த வரிமக் கருவியை உணவுப் பொருட்களின் அருகில் காட்டினால், அதிலுள்ள ஒவ்வாமைப் பொருட்கள், வேதிப் பொருட்கள், ஊட்டசத்துக்கள் கலோரி எண்ணிக்கை அனைத்தையும் பிரித்து நமக்கு காட்டிவிடும். ஒரு கிராமுக்கு எவ்வளவு சர்க்கரை உள்ளது, கொழுப்பு உள்ளது என பலவித தகவல்களையும் தெரிவித்துவிடும் ஆற்றலும் உடையது.

ஜங்புட் எனப்படும் கொழுப்பு மற்றும் அதிக கலோரி அளவு கொண்ட உணவுகளை அல்லது தேவையற்ற உணவுப் பொருட்களை உண்ணாமல் இருக்க விரும்புவோர், தாங்கள் சாப்பிடுகின்ற உணவுப் பொருட்களை எளிதாக சோதனை செய்ய உதவும் வகையில் இந்த உணவு வரிமக் கருவியை உருவாக்கியுள்ளதாக இதனை வடிவமைத்தோர் தெரிவித்துள்ளனர். இன்று மின்னஞ்சல் பார்ப்பது எவ்வளவு எளிதாக உள்ளதோ, அவ்வளவு எளிதாக உணவிலுள்ள கலோரி அளவை அறிந்துக் கொள்ளும் வசதியை உருவாக்கிக் கொடுக்க இந்த ஆய்வாளர்கள் முயன்றுள்ளனர்.

சிறியதொரு இராமன் நிறமாலை தொழிற்நுட்பம், தனித்தமையான கிளட் எனப்படும் மேகக்கணிமை அடிப்படையிலான படிமுறை தீர்வு, எளியதொரு App எனப்படும் மென்ஒருங்கு ஆகியவற்றை பயன்படுத்தி, இந்த உணவு வரிமக் கருவி உணவிலுள்ள கலோரி அளவை சரியாக காட்டிவிடுகிறது.

இந்த கருவி உணவுப் பொருட்களின் முன்னால் காட்டப்பட்டவுடன் குறைந்த வீரியமுள்ள ஊடொளியை அவற்றின் மேல் அனுப்புகிறது. ஊடொளி உணவுப் பொருட்களின் மேல் பட்டு திரும்பிவரும் ஒளி அலைகளை வைத்து அதிலுள்ள கூறுகளை பிரித்தெடுக்கிறது. அந்த தரவுகள் அக்கருவியில் ஏற்கெனவே சேமிக்கப்பட்டிருக்கும் தரவுகளோடு ஒப்பிடப்பட்டு, முடிவுகள் பயன்பாட்டளரின் ஸ்மாட் செல்லிடபேசியில் வழங்கப்படுகின்றன.